倉鼠糧分享

毛毛小小年紀已經係一個食家，哈哈，事關佢既主人係咁買新糧比佢試
依家出番個報告先XP
不過聲明先，每隻鼠既口味都唔同，以下只係根據毛毛口味～

第一次:
Pet's 88 海鮮糧
購買地點: 旺角 I love Rabbit
價錢: HKD10

毛毛一來就接受，蝦仔同魚仔食完就會係咁飲水，不過我覺得成包糧感覺唔多新鮮。瓜子花生感覺唔係靚野，好似放左好耐，魚仔蝦仔都唔係靚野。後來睇文話除尿臭既野都放好多味精，係咪真就唔知啦，亦唔覺有咩效果@@ 但每粒睇上來真係成袋都無乜野好食咁。一分錢一分貨啦，10蚊既質素。

其實自然來講，倉鼠唔會住近海，亦唔會食到海鮮，所以係咪真係有必要食海鮮糧?@@我覺得無乜謂~

再買:
日本糧
購買地點: 旺角紅蘿蔔
價錢: HKD44

諗住日本野好似幾正，而且見硬硬地可以幫佢磨下牙，一打開，有一浸唔知點形容既味，唔係臭，但都唔係香@@

混埋上面個包海鮮比佢食。點知...佢一拎到聞兩聞食兩啖就一野扔開左...個下真係無奈'''有紅色同綠色，紅色可以話係食都唔食，綠色就都食半粒。(每隻唔同既，執番來個隻福仔就乜都食，其實到後來毛毛都有食，但食得唔多囉)

其實同時都有買同一牌子既葵花瓜子，質素就好正，而且好多。

見毛毛兩隻糧都唔太岩食，就再爬文同四出搜尋啦，見大家都盛讚Oxbow, Mazuri & Prestige. 但我都係無買到呢3隻XDD

第三次買左外國野，Witte Molen
購買地點: 旺角I love Rabbit
價錢: HKD44 好大包

右邊透明位見到有紅黃粒同綠色條，size 幾好，仲有些香蕉片。
打開唔太香，基本上係無乜味，不過包裝就唔多方便啦，無密實袋設計。

比毛毛試下，又係唔太食...(太失敗啦)，但接受程度比日本糧高，無一野扔左XDD 特別係好鐘意食香蕉片。

不過有次唔小心滴左水落D糧到，即刻變左黃色水，我先諗到，其實有色既糧係好多色素。而係呢個世界，人食既野已經好多都有毒又用埋d 致癌野，又無乜監管，更何況係動物食既野?! 可能係零監管都唔出奇，用既料究竟係咩都無人知。

食左幾日，毛毛竟然屙綠色屎...同包糧個隻綠色差唔多，不過淺些。強調:未必同呢隻糧有關，因為發現餵佢食橙都係同一段日子，未知係邊個原因，要再觀察先知。而且福仔食左都唔見有綠色便便。

呢段時間一直係3 種糧混埋食

直到海鮮糧終於食完，於是前幾日終於又買新糧..
今次係：

Prestige 水果糧 (不過個包裝唔係寫Prestige)
購買地點: 旺角I love Rabbit
價錢: HKD28

一打開，好香，感覺好味過以前個Ｄ，再睇入面都係天然野，有Ｄ花生呀瓜子呀粟米麥片等等，同海鮮個包有Ｄ似，不過就咁睇都覺得質素好好多，而且多Ｄ唔同既料，不過有Ｄ就幾碎下，無得用來磨牙。

果然毛毛勁鐘意，次次都食o西。不過就要挑起瓜子。Overall 質素真係好好! 值!

綜合:

我初頭都鐘意買人工合成糧，亦有好多人話會無咁易肥。不過諗諗下，都係成番天然既野好些，話o西佢合成左，其實成份係完全唔知，有幾多成係個樣野，或者係咪佢講既個樣野整出來都唔知，五顏六色更加唔買得，都唔知用咩色素。

另外，間唔中比新鮮水果佢食 (蘋果,梨,橙佢都食) 同一定要飲熟水就OK。 試過有次比心心水(大枝飲水機個隻) 佢飲，點知屙又臭又林既屎，即轉番熟水就無事。

都係個句，唔同鼠唔同既~

毛毛的新家

依家覺得個籠其實都幾細，不過個陣覺得新手平平地試下先算啦。帶毛毛番屋企，佢係個袋入面叫，(依家知啦，原來叫得出係驚啦)，我咁大個城市人真係未聽過鼠類動物叫，原來都有少少似雀仔叫 (@@)

番到屋企，佈置一番，放毛毛入新屋，餵下野食，都唔敢餵太多。一入籠就咬籠啦，個陣唔知頭唔知路都幾擔心，以為佢要磨牙，又唔識點搞。

毛毛最鐘意食瓜子，原來仲識開殼咁得意。初頭唔識，見佢鐘意食瓜子就餵，依家咁肥就真係要減食啦。

食野個陣任摸唔嬲，但食完就唔比摸啦，除非你再比野食啦 XD

仲有一項技能就係爬籠加單槓，可以兩隻手捉住籠頂係咁行，勁過癮XD 仲識自動走去沖涼沙到碌同尿，唔會整到周圍污漕。（執到既個隻唔識碌沙@@)

但係就唔會跑輪@@ (後尾特登買左個鐵輪比佢,又係唔跑，後尾執左隻被遺棄既鼠，見到原來我地自己裝錯左個輪搞到轉得唔係幾好，好白痴 haha， 依家裝番岩佢就成日上去跑啦)


毛毛好活躍，但又唔會特別驚青咁。慢慢開始覺得，呢個size都幾好，幾得意。又係到諗，點解佢可以住o西成格呢，唔通佢係賣剩蔗，無人揀佢? Anthony就話，可能因為佢醒，識得呢埋XDD後尾睇文話其實好多寵物店D鼠打交都打到死，咁毛毛識捱到最後，應該都幾醒gua??　哈哈，不過佢幾惡就真既，有時會咬下手指。

買個陣無乜留意，慢慢發現其實毛毛個樣都幾靚(女仔來ga)，耳仔尖尖，眼仔碌碌，肥肥地，倉鼠入面算係好可愛。

毛毛初來報到

2012年2月底在旺角金魚街 I love Rabbit 買了毛毛。

當時一心買隻小倉鼠養，理想中要金黃色的。當時是新手一名，沒有爬文，沒有research 就盲中中去買 (無論養咩都極不建議此舉)，去左２間，得番一隻金黃色，其他都係白色銀狐 (bio lab劏過白老鼠)，野生色，小紫王，小灰霸等既深色都唔太鐘意。

無得揀既情況下，見到唯一一隻金黃色 (後來爬文先知叫布丁鼠) 被標示為肥倉鼠，佢自己一個住成格，係到訓緊覺。我本身鐘意細小小既倉鼠仔，覺得好cute，見到「肥」字唔太想買，但店員捉出佢出來，話係女仔，Anthony話好得意幾好，而我又始終鐘意金黃色，就買下了毛毛。(其實諗番個陣完全唔識睇下佢健唔健康，哈，正係知佢隻眼幾精靈)

當時其實本身想買一男一女，問個店員可唔可以幾種養埋一齊會唔會打交，佢竟然話無問題 (當然後尾研究一番先知係要一鼠一籠!! 好彩當時得毛毛一隻布丁先無買多一隻鼠)

揀左個普普通通平平地既籠，諗住新手平平地開始試下先，細包的Alex海鮮糧HKD10 (後尾發現質素真係麻麻，好彩買左細包)，沖涼沙，磨牙石(無磨過)，火箭形既兜(本身比佢用來沖涼，但發現佢鐘意用來做窩)，木糠。咁就帶左毛毛回家去啦。